جلوہ تو بڑی شے ہے شرارہ نہیں ملتا

جلوہ تو بڑی شے ہے شرارہ نہیں ملتا

جز تیرے کوئی اور سہارا نہیں ملتا

میں کیا ہوں مری خاک بھی باقی نہیں رہتی

اے جان اگر تیرا سہارا نہیں ملتا

یہ بحر محبت ہے ارے ڈوبنے والے

طوفان تو ملتے ہیں کنارا نہیں ملتا

دیکھے ہیں حسیں اور بھی دنیا میں ہزاروں

تم جیسا جہاں میں کوئی پیارا نہیں ملتا

آ جاؤ کہ مشتاق نظر ڈھونڈ رہی ہے

بیمار محبت کو سہارا نہیں ملتا

چھپ چھپ کے فناؔ کرتے ہو اے جان تمنا

چلمن سے بھی جلووں کا نظارا نہیں ملتا