jo dil-nisar-e-jalwa-e-jaanana ho gaya

jo dil-nisār-e-jalva-e-jānāna ho gayā

vo bhī tumhāre husn kā dīvāna ho gayā

vo 'ishq ban ke jab mire dil meñ samā ga.e

merā junūñ tajallī-e-jānāna ho gayā

sab āstān-e-yār ke naqsh-o-nigār haiñ

kā'ba kahīñ banā kahīñ but-ḳhāna ho gayā

uTThī jidhar bhī bazm meñ un kī nigāh-e-nāz

mastāna ho gayā koī dīvāna ho gayā

jalva butoñ meñ yaar kā aane lagā nazar

kā'ba hamāre vāste but-ḳhāna ho gayā

tasvīr us sanam kī jo dil meñ samā ga.ī

hāsil mire junūñ kā sanam-ḳhāna ho gayā

vo ban gayā charāġh-e-haram 'ishq meñ 'fanā'

un pe fidā jo sūrat-e-parvāna ho gayā

jo dil-nisar-e-jalwa-e-jaanana ho gaya

wo bhi tumhaare husn ka diwana ho gaya

wo 'ishq ban ke jab mere dil mein sama gae

mera junun tajalli-e-jaanana ho gaya

sab aastan-e-yar ke naqsh-o-nigar hain

ka'ba kahin bana kahin but-KHana ho gaya

uTThi jidhar bhi bazm mein un ki nigah-e-naz

mastana ho gaya koi diwana ho gaya

jalwa buton mein yar ka aane laga nazar

ka'ba hamare waste but-KHana ho gaya

taswir us sanam ki jo dil mein sama gai

hasil mere junun ka sanam-KHana ho gaya

wo ban gaya charagh-e-haram 'ishq mein 'fana'

un pe fida jo surat-e-parwana ho gaya