mujhe Tal tu na saqi tere dar ka main gada hun

mujhe Taal tū na saaqī tire dar kā maiñ gadā huuñ

mire jānāñ aaj tujh se maiñ tujhī ko māñgtā huuñ

yahī kā’ba-e-mohabbat yahī merī zindagī hai

tirā dar hai merī manzil tire dar pe aa paḌā huuñ

na sanam-kade se nisbat na haram se kuchh ta'alluq

tirī yaad ke sahāre maiñ jahāñ meñ jī rahā huuñ

mirī laaj rakh le jānāñ mujhe apnā tū banā le

tire 'ishq kī lagan meñ tire dar pe aa paḌā huuñ

yahī ek iltijā hai mirī tujh se mere jānāñ

maiñ bichhaḌ ke do-jahāñ se tirā qurb chāhtā huuñ

na uThūñgā tere dar se ki nibhānā hī paḌegā

tirā huuñ to nām-levā maiñ burā huuñ yā bhalā huuñ

maiñ 'fanā' huuñ tere ġham meñ tū baqā kā jaam de de

tū karīm hai karam kar maiñ gadā-e-be-navā huuñ

mujhe Tal tu na saqi tere dar ka main gada hun

mere jaanan aaj tujh se main tujhi ko mangta hun

yahi ka’ba-e-mohabbat yahi meri zindagi hai

tera dar hai meri manzil tere dar pe aa paDa hun

na sanam-kade se nisbat na haram se kuchh ta'alluq

teri yaad ke sahaare main jahan mein ji raha hun

meri laj rakh le jaanan mujhe apna tu bana le

tere 'ishq ki lagan mein tere dar pe aa paDa hun

yahi ek iltija hai meri tujh se mere jaanan

main bichhaD ke do-jahan se tera qurb chahta hun

na uThunga tere dar se ki nibhana hi paDega

tera hun to nam-lewa main bura hun ya bhala hun

main 'fana' hun tere gham mein tu baqa ka jam de de

tu karim hai karam kar main gada-e-be-nawa hun