مجھے ٹال تو نہ ساقی ترے در کا میں گدا ہوں

مجھے ٹال تو نہ ساقی ترے در کا میں گدا ہوں

مرے جاناں آج تجھ سے میں تجھی کو مانگتا ہوں

یہی کعبۂ محبت یہی میری زندگی ہے

ترا در ہے میری منزل ترے در پہ آ پڑا ہوں

نہ صنم کدے سے نسبت نہ حرم سے کچھ تعلق

تری یاد کے سہارے میں جہاں میں جی رہا ہوں

مری لاج رکھ لے جاناں مجھے اپنا تو بنا لے

ترے عشق کی لگن میں ترے در پہ آ پڑا ہوں

یہی ایک التجا ہے مری تجھ سے میرے جاناں

میں بچھڑ کے دو جہاں سے ترا قرب چاہتا ہوں

نہ اٹھوں گا تیرے در سے کہ نبھانا ہی پڑے گا

ترا ہوں تو نام لیوا میں برا ہوں یا بھلا ہوں

میں فناؔ ہوں تیرے غم میں تو بقا کا جام دے دے

تو کریم ہے کرم کر میں گدائے بے نوا ہوں