teri chashm-e-karam ka gar ishaara ho to aisa ho

terī chashm-e-karam kā gar ishāra ho to aisā ho

kahe ḳhud be-kasī merī sahārā ho to aisā ho

na jumbish ho laboñ par aur dīvānoñ kī bin aa.e

nigāhoñ hī nigāhoñ meñ ishāra ho to aisā ho

ba-juz yād-e-sanam jo sab jalā kar ḳhaak kar Daale

mohabbat kā mere dil meñ sharāra ho to aisā ho

na phaile ġhair ke aage kabhī dast-e-talab merā

mire vāris karam mujh par tumhārā ho to aisā ho

ho zikr-e-yār bāteñ yaar kī aur yaar ke charche

huā hai rab se shuġhl-e-zīst hamārā ho to aisā ho

ho sar par dāman-e-vāris laboñ par kalma-e-tayyab

safar mahshar ko yā-rab jab hamārā ho to aisā ho

diyā hai dil to dil meñ dard ho aur dard meñ lazzat

karam mujh par mirī jaañ gar tumhārā ho to aisā ho

jahāñ dekhūñ jidhar dekhūñ sahar dekhūñ yā shab dekhūñ

tū hī to bas nazar aa.e nazāra ho to aisā ho

kisī karvaT kisī pahlū sukūn-e-dil na pāūñ maiñ

tirī ulfat meñ hāl-e-dil hamārā ho to aisā ho

jabīñ sajde meñ ho aur sāmne tū ho nigāhoñ meñ

'farāz' a.alam se jaanā jab hamārā ho to aisā ho

teri chashm-e-karam ka gar ishaara ho to aisa ho

kahe KHud be-kasi meri sahaara ho to aisa ho

na jumbish ho labon par aur diwanon ki bin aae

nigahon hi nigahon mein ishaara ho to aisa ho

ba-juz yaad-e-sanam jo sab jala kar KHak kar Dale

mohabbat ka mere dil mein sharara ho to aisa ho

na phaile ghair ke aage kabhi dast-e-talab mera

mere waris karam mujh par tumhaara ho to aisa ho

ho zikr-e-yar baaten yar ki aur yar ke charche

hua hai rab se shughl-e-zist hamara ho to aisa ho

ho sar par daman-e-waris labon par kalma-e-tayyab

safar mahshar ko ya-rab jab hamara ho to aisa ho

diya hai dil to dil mein dard ho aur dard mein lazzat

karam mujh par meri jaan gar tumhaara ho to aisa ho

jahan dekhun jidhar dekhun sahar dekhun ya shab dekhun

tu hi to bas nazar aae nazara ho to aisa ho

kisi karwaT kisi pahlu sukun-e-dil na paun main

teri ulfat mein haal-e-dil hamara ho to aisa ho

jabin sajde mein ho aur samne tu ho nigahon mein

'faraaz' aalam se jaana jab hamara ho to aisa ho