tu apne wahm-e-hasti se nikal hasti usi ki hai

tū apne vahm-e-hastī se nikal hastī usī kī hai

tū us ke ilm kā ma.alūm ban bastī usī kī hai

vo har zarra kā ḳhāliq hai vo har zarra kā mālik hai

bulandī bhī usī kī aur ye pastī usī kī hai

mirā mujh meñ ba-juz ik vahm-e-hastī ke nahīñ kuchh bhī

maiñ apnī zaat se ḳhud niist huuñ hastī usī kī hai

tū nāqis hai vo kāmil hai tū murda hai vo zinda hai

adam hai tū vahī ābād hai bastī usī kī hai

sharāb-e-ishq-irfāñ pī ke har dam mast huuñ 'ġhausī'

mujhe mastī jo rahtī hai to ye mastī usī kī hai

tu apne wahm-e-hasti se nikal hasti usi ki hai

tu us ke ilm ka malum ban basti usi ki hai

wo har zarra ka KHaliq hai wo har zarra ka malik hai

bulandi bhi usi ki aur ye pasti usi ki hai

mera mujh mein ba-juz ek wahm-e-hasti ke nahin kuchh bhi

main apni zat se KHud nist hun hasti usi ki hai

tu naqis hai wo kaamil hai tu murda hai wo zinda hai

adam hai tu wahi aabaad hai basti usi ki hai

sharab-e-ishq-irfan pi ke har dam mast hun 'ghausi'

mujhe masti jo rahti hai to ye masti usi ki hai