aaj wo saqi hain main mai-KHwar hun

aaj vo saaqī haiñ maiñ mai-ḳhvār huuñ

be-ḳhudī hai mast huuñ sarshār huuñ

kaif ye hai maiñ huuñ vo aur vo haiñ maiñ

goyā ḳhud saaqī huuñ aur mai-ḳhvār huuñ

dekhtā huuñ ḳhud ko bhī ab tū haiñ vo

aisā mahv-e-jalva-e-dildār huuñ

jab huā ḳhālī to mujh se bhar ga.e

hañs ke bole maiñ jamāl-e-yār huuñ

vo maze pesh-e-nazar haiñ mujh meñ haiñ

kis se bolūñ tālib-e-dīdār huuñ

paañv par saaqī ke rakh detā huuñ sar

kis qadar mastī meñ bhī hushiyār huuñ

aap hī bande meñ haiñ banda-navāz

maiñ huuñ kyā ik banda-e-sarkār huuñ

sho’bada huuñ sahar huuñ mashq-e-nazar

kuchh huuñ un kā garmī-e-bāzār huuñ

aap be-parda haiñ jitnā maiñ harīs

dekhtā huuñ tālib-e-dīdār huuñ

un kā hai vo haiñ jo kuchh bhī mujh meñ hai

kushta-e-tīr-e-nigāh-e-yār huuñ

haal kyā batlā.ūñ maiñ 'ġhausī' kise

ā.īna huuñ ā.īna-ruḳhsār huuñ

aaj wo saqi hain main mai-KHwar hun

be-KHudi hai mast hun sarshaar hun

kaif ye hai main hun wo aur wo hain main

goya KHud saqi hun aur mai-KHwar hun

dekhta hun KHud ko bhi ab tu hain wo

aisa mahw-e-jalwa-e-dildar hun

jab hua KHali to mujh se bhar gae

hans ke bole main jamal-e-yar hun

wo maze pesh-e-nazar hain mujh mein hain

kis se bolun talib-e-didar hun

panw par saqi ke rakh deta hun sar

kis qadar masti mein bhi hushiyar hun

aap hi bande mein hain banda-nawaz

main hun kya ek banda-e-sarkar hun

sho’bada hun sahar hun mashq-e-nazar

kuchh hun un ka garmi-e-bazar hun

aap be-parda hain jitna main haris

dekhta hun talib-e-didar hun

un ka hai wo hain jo kuchh bhi mujh mein hai

kushta-e-tir-e-nigah-e-yar hun

haal kya batlaun main 'ghausi' kise

aaina hun aaina-ruKHsar hun