آج وہ ساقی ہیں میں میخوار ہوں

آج وہ ساقی ہیں میں میخوار ہوں

بیخودی ہے مست ہوں سرشار ہوں

کیف یہ ہے میں ہوں وہ اور وہ ہیں میں

گویا خود ساقی ہوں اور میخوار ہوں

دیکھتا ہوں خود کو بھی اب تو ہیں وہ

ایسا محوِ جلوۂ دلدار ہوں

جب ہوا خالی تو مجھ سے بھر گئے

ہنس کے بولے میں جمالِ یار ہوں

وہ مزے پیشِ نظر ہیں مجھ میں ہیں

کس سے بولوں طالبِ دیدار ہوں

پاؤں پر ساقی کے رکھ دیتا ہوں سر

کس قدر مستی میں بھی ہشیار ہوں

آپ ہی بندے میں ہیں بندہ نواز

میں ہوں کیا اک بندۂ سرکار ہوں

شعبدہ ہوں، سحر ہوں، مشقِ نظر

کچھ ہوں ان کا گرمئی بازار ہوں

آپ بے پردہ ہیں جتنا، میں حریص

دیکھتا ہوں، طالب دیدار ہوں

ان کا ہے وہ ہیں جو کچھ بھی مجھ میں ہے

کشتۂ تیرِ نگاہِ یار ہوں

حال کیا بتلاؤں میں غوثیؔ کسے

آئینہ ہوں، آئینہ رخسار ہوں