کیا سے کیا دو دن میں حالت ہو گئی

کیا سے کیا دو دن میں حالت ہو گئی

دل نہ آیا اک قیامت ہو گئی

اب جو چاہیں وہ کریں مختار ہیں

ہو گئی اب تو محبت ہو گئی

چھانتا ہوں رات دن اب خاک میں

تیری فرقت میں یہ حالت ہو گئی

آنکھ سے آنسو نکل سکتا نہیں

ناتوانی سے یہ صورت ہو گئی

بعد مرنے کے ہوئی مٹی عظیم

تیرے کوچے میں جو تربت ہو گئی

کیا کہوں ناصح محبت کیوں ہوئی

ہو گئی بس ان سے الفت ہو گئی

آپ تو مشتاقؔ کا چھوڑیں نہ ساتھ

ہو گئی دنیا کو نفرت ہو گئی