KHabar kya thi aankhon ko de kar wo aansu mere dil ki har ek KHushi chhin lenge

ḳhabar kyā thī āñkhoñ ko de kar vo aañsū mire dil kī har ik ḳhushī chhīn leñge

mohabbat jatā kar judā hoñge aise ki mujh se mirī maut bhī chhīn leñge

likhā maiñ ne ḳhat aaj bilā-‘uzr aanā to qāsid se farmā.e jākar ye kah de

judā ho ke chhīnī hai maut ham ne lekin vahāñ aa.e to zindagī chhīn leñge

lagā kar vo maḳhmūr āñkhoñ meñ kājal ye farmā.e rindoñ ko dikhlā ke chhāgal

tumheñ ham pilā.eñge par shart hai ye ki tum se tumhārī ḳhudī chhīn leñge

jalā kar patañgoñ ko itrā na itnā ai maġhrūr sham.a zarā hosh meñ aa

ki bād-e-muḳhālif ke āzād jhoñke tirī chulbulī raushnī chhīn leñge

'hunar' un ko laḌne ko aane to diije yahī soch kar aaj baiThe haiñ ham bhī

kareñge vo kyā vaar hāthoñ se un ke jo ham baḌh ke shamshīr hī chhīn leñge

KHabar kya thi aankhon ko de kar wo aansu mere dil ki har ek KHushi chhin lenge

mohabbat jata kar juda honge aise ki mujh se meri maut bhi chhin lenge

likha main ne KHat aaj bila-‘uzr aana to qasid se farmae jakar ye kah de

juda ho ke chhini hai maut hum ne lekin wahan aae to zindagi chhin lenge

laga kar wo maKHmur aankhon mein kajal ye farmae rindon ko dikhla ke chhagal

tumhein hum pilaenge par shart hai ye ki tum se tumhaari KHudi chhin lenge

jala kar patangon ko itra na itna ai maghrur shama zara hosh mein aa

ki baad-e-muKHalif ke aazad jhonke teri chulbuli raushni chhin lenge

'hunar' un ko laDne ko aane to dije yahi soch kar aaj baiThe hain hum bhi

karenge wo kya war hathon se un ke jo hum baDh ke shamshir hi chhin lenge