خبر کیا تھی آنکھوں کو دے کر وہ آنسو مرے دل کی ہر اک خوشی چھین لیں گے

خبر کیا تھی آنکھوں کو دے کر وہ آنسو مرے دل کی ہر اک خوشی چھین لیں گے

محبت جتا کر جدا ہوں گے ایسے کہ مجھ سے مری موت بھی چھین لیں گے

لکھا میں نے خط میں بلا عذر آنا تو قاصد سے فرمائے جا کر یہ کہہ دے

جدا ہو کے چھینی ہے موت ہم نے لیکن وہاں آئے تو زندگی چھین لیں گے

لگا کر وہ مخمور آنکھوں میں کاجل یہ فرمائے رندوں کو دکھلا کے چھاگل

تمہیں ہم پلائیں گے پر شرط ہے یہ کہ تم سے تمہاری خودی چھین لیں گے

جلا کر پتنگوں کو اترا نہ اتنا اے مغرور شمع ذرا ہوش میں آ

کہ باد مخالف کے آزاد جھونکے تری چلبلی روشنی چھین لیں گے

ہنرؔ ان کو لڑنے کو آنے تو دیجے یہی سوچ کر آج بیٹھے ہیں ہم بھی

کریں گے وہ کیا وار ہاتھوں سے ان کے جو ہم بڑھ کے شمشیر ہی چھین لیں گے