تضمینی کلام - ہر ایک فرد کے کام آنا کام ہے تیرا

ہر ایک فرد کے کام آنا کام ہے تیرا

ہر ایک دل میں جہاں احترام ہے تیرا

نگاہِ ناز میں ارفع مقام ہے تیرا

فرشتے پڑھتے ہیں جس کو وہ نام ہے تیرا

بڑی جناب تری فیضِ عام ہے تیرا

کنارے عشق کے تیری کشش سے ہیں قائم

نظارے عشق کے تیری کشش سے ہیں قائم

اشارے عشق کے تیری کشش سے ہیں قائم

ستارے عشق کے تیری کشش سے ہیں قائم

نظامِ مہر کی صورت نظام ہے تیرا

تری ادائے سخاوت ہے زندگی دل کی

تری نظر کی کرامت ہے زندگی دل کی

دیارِ حق سے قرابت ہے زندگی دل کی

تری لحد کی زیارت ہے زندگی دل کی

مسیح و خضر سے اونچا مقام ہے تیرا

دکھائی دیتا ہے رحمت میں رنگِ محبوبی

ملا ہے تیری صداقت میں رنگِ محبوبی

عیاں ہوا تری شفقت میں رنگِ محبوبی

نہاں ہے تیری محبت میں رنگِ محبوبی

بڑی ہے شان، بڑا احترام ہے تیرا