ikaTThe ho ke husn-o-ishq mere dil mein rahte hain

ikaTThe ho ke husn-o-'ishq mere dil meñ rahte haiñ

yahāñ lailā-o-majnūñ ek hī mahmil meñ rahte haiñ

kiyā hai qatl to ham ko kahāñ jaate ho dekheñge

ki qātil baa'd kushtan dīda-e-bismil meñ rahte haiñ

samā sakte na the vo jo zamīn-o-āsmāñ meñ bhī

ye simTe haiñ hamārī aañkh ke jo til meñ rahte haiñ

makāñ se bhī ulfat hai agarche lā-makāñ haiñ vo

pata dete nahīñ apnā ye āb-o-gil meñ rahte haiñ

nikal kar jā nahīñ sakte kahīñ ḳhurshīd se zarre

jo simTe shams meñ rahte haiñ phaile zil meñ rahte haiñ

hayāt-e-'ishq kā mujh se Thikāna pūchhte kyā ho

vo kar ḳhvār-o-rusvā zālim-o-jāhil meñ rahte haiñ

vujūd husn-e-mu'allaq se tahī-dastī nahīñ mumkin

kabhī dast-e-saḳhā meñ gah yad-e-sā.il meñ rahte haiñ

vo apne dekhne vāloñ kī āñkhoñ meñ samā.ae haiñ

ki apnā ghar banā kar dīda-e-mashāġhil meñ rahte haiñ

nahīñ haiñ duur ham ik aan 'ulvī' apne mirzā se

agarche ḳhud haiñ nāqis pahlu-e-kāmil meñ rahte haiñ

ikaTThe ho ke husn-o-'ishq mere dil mein rahte hain

yahan laila-o-majnun ek hi mahmil mein rahte hain

kiya hai qatl to hum ko kahan jate ho dekhenge

ki qatil ba'd kushtan dida-e-bismil mein rahte hain

sama sakte na the wo jo zamin-o-asman mein bhi

ye simTe hain hamari aankh ke jo til mein rahte hain

makan se bhi ulfat hai agarche la-makan hain wo

pata dete nahin apna ye aab-o-gil mein rahte hain

nikal kar ja nahin sakte kahin KHurshid se zarre

jo simTe shams mein rahte hain phaile zil mein rahte hain

hayat-e-'ishq ka mujh se Thikana puchhte kya ho

wo kar KHwar-o-ruswa zalim-o-jahil mein rahte hain

wujud husn-e-mu'allaq se tahi-dasti nahin mumkin

kabhi dast-e-saKHa mein gah yad-e-sail mein rahte hain

wo apne dekhne walon ki aankhon mein samaae hain

ki apna ghar bana kar dida-e-mashaghil mein rahte hain

nahin hain dur hum ek aan 'ulwi' apne mirza se

agarche KHud hain naqis pahlu-e-kaamil mein rahte hain