is taraf bhi karam ai rashk-e-masiha karna

is taraf bhī karam ai rashk-e-masīhā karnā

ki tumheñ aatā hai bīmār kā achchhā karnā

be-ḳhud jalva se kahtā hai ye jalva un kā

lutf-e-nazāra uThā hosh sambhālā karnā

ai junūñ kyuuñ liye jaatā hai bayābāñ meñ mujhe

jab tujhe aatā hai ghar ko mire sahrā karnā

jab ba-juz tere koī dūsrā nahīñ maujūd

phir samajh meñ nahīñ aatā terā parda karnā

yahī vo kaam haiñ nākām mohabbat ke liye

kabhī un kā kabhī taqdīr kā shikva karnā

ham bhī dekheñ tire ā.īna-e-ruḳh ko lekin

shaaq hai gard-e-nazar se use dhuñdlā karnā

koī jā ho dair-o-haram ho ke sanam-ḳhāna ho

ham ko naqsh-e-qadam yaar pe sajda karnā

dekh le jā ke vo dariyā pe tamāshā-e-habāb

jis ko manzūr ho nazāra-e-duniyā karnā

parda-e-hastī-e-mauhūm haTā lo pahle

phir jahāñ chāho vahāñ yaar ko dekhā karnā

shikva aur shikva-e-mahbūb ilāhī tauba

kufr hai maz.hab-e-ushshāq meñ shikva karnā

ek tum ho ki tumheñ baat kā kuchh paas nahīñ

aur ik ham ki hameñ muñh se jo kahnā karnā

vo mere ashk ko dāman pe jagah dete haiñ

ya.anī manzūr hai us qatre ko dariyā karnā

aisī āñkhoñ ke tasadduq mirī āñkheñ 'bedam'

ki jinheñ aatā hai aġhyār ko apnā karnā

is taraf bhi karam ai rashk-e-masiha karna

ki tumhein aata hai bimar ka achchha karna

be-KHud jalwa se kahta hai ye jalwa un ka

lutf-e-nazara uTha hosh sambhaala karna

ai junun kyun liye jata hai bayaban mein mujhe

jab tujhe aata hai ghar ko mere sahra karna

jab ba-juz tere koi dusra nahin maujud

phir samajh mein nahin aata tera parda karna

yahi wo kaam hain nakaam mohabbat ke liye

kabhi un ka kabhi taqdir ka shikwa karna

hum bhi dekhen tere aaina-e-ruKH ko lekin

shaq hai gard-e-nazar se use dhundla karna

koi ja ho dair-o-haram ho ke sanam-KHana ho

hum ko naqsh-e-qadam yar pe sajda karna

dekh le ja ke wo dariya pe tamasha-e-habab

jis ko manzur ho nazara-e-duniya karna

parda-e-hasti-e-mauhum haTa lo pahle

phir jahan chaho wahan yar ko dekha karna

shikwa aur shikwa-e-mahbub ilahi tauba

kufr hai mazhab-e-ushshaq mein shikwa karna

ek tum ho ki tumhein baat ka kuchh pas nahin

aur ek hum ki hamein munh se jo kahna karna

wo mere ashk ko daman pe jagah dete hain

yani manzur hai us qatre ko dariya karna

aisi aankhon ke tasadduq meri aankhen 'bedam'

ki jinhen aata hai aghyar ko apna karna