مر مٹے جب ہم تو کچھ کچھ راہ پر آنے لگے

مر مٹے جب ہم تو کچھ کچھ راہ پر آنے لگے

وہ ہماری قبر کو آ آ کے ٹھکرانے لگے

اپنے دامن کی ہوا دیتے ہیں جن کو غش میں آپ

آنکھ کیوں کھلنے لگی کیوں ہوش میں آنے لگے

عشق میں مرنا حیات جاودانی ہے مجھے

تم سلامت میرے دشمن جان سے جانے لگے

آپ یہ اچھی تسلی ہم کو دینے آئے تھے

پوچھ کر باعث تڑپ کا اور تڑپانے لگے

کیا کسی حسرت بھری دل کو کیا ہے پائمال

ہاتھ کچھ مل مل کے کیوں اس وقت پچھتانے لگے

انتہا کی شوخ چشم اے دل سمجھنا تو اسے

بے حجابی کی جگہ جو آنکھ شرمانے لگے

بیٹھ جانے کی اجازت اس نے دی ہے تھوڑی دے

بس جلالؔ اٹھو بہت تم پاؤں پھیلانے لگے