shahr ke dukandaro karobar ulfat mein sud kya ziyan kya hai tum na jaan paoge

shahr ke dukāndāro kārobār ulfat meñ suud kyā ziyāñ kyā hai tum na jaan pāoge

dil ke daam kitne haiñ ḳhvāb kitne mahñge haiñ aur naqd-e-jāñ kyā hai tum na jaan pāoge

koī kaise miltā hai phuul kaise khiltā hai aañkh kaise jhuktī hai saañs kaise ruktī hai

kaise rah nikaltī hai kaise baat chaltī hai shauq kī zabāñ kyā hai tum na jaan pāoge

vasl kā sukūñ kyā hai hijr kā junūñ kyā hai husn kā fusūñ kyā hai 'ishq ke darūñ kyā hai

tum marīz-e-dānā.ī maslahat ke shaidā.ī rāh-e-gum-rahāñ kyā hai tum na jaan pāoge

zaḳhm kaise phalte haiñ daaġh kaise jalte haiñ dard kaise hotā hai koī kaise rotā hai

ashk kyā haiñ naale kyā dasht kyā haiñ chhāle kyā aah kyā fuġhāñ kyā hai tum na jaan pāoge

jāntā huuñ maiñ tum ko zauq-e-shā'irī bhī hai shaḳhsiyat sajāne meñ ik ye māhrī bhī hai

phir bhī harf chunte ho sirf lafz sunte ho un ke darmiyāñ kyā hai tum na jaan pāoge

shahr ke dukandaro karobar ulfat mein sud kya ziyan kya hai tum na jaan paoge

dil ke dam kitne hain KHwab kitne mahnge hain aur naqd-e-jaan kya hai tum na jaan paoge

koi kaise milta hai phul kaise khilta hai aankh kaise jhukti hai sans kaise rukti hai

kaise rah nikalti hai kaise baat chalti hai shauq ki zaban kya hai tum na jaan paoge

wasl ka sukun kya hai hijr ka junun kya hai husn ka fusun kya hai 'ishq ke darun kya hai

tum mariz-e-danai maslahat ke shaidai rah-e-gum-rahan kya hai tum na jaan paoge

zaKHm kaise phalte hain dagh kaise jalte hain dard kaise hota hai koi kaise rota hai

ashk kya hain nale kya dasht kya hain chhaale kya aah kya fughan kya hai tum na jaan paoge

jaanta hun main tum ko zauq-e-sha'iri bhi hai shaKHsiyat sajaane mein ek ye mahri bhi hai

phir bhi harf chunte ho sirf lafz sunte ho un ke darmiyan kya hai tum na jaan paoge