agar jamal-e-haqiqat se rabt mohkam hai

agar jamāl-e-haqīqat se rabt mohkam hai

nafas nafas meñ na.ī zindagī kā 'ālam hai

na koī ḳhaar na zāhid koī jahannam hai

ḳhud apnī-apnī nazar apnā-apnā 'ālam hai

har ek qatre meñ dariyā-e-ma’arifat hai ravāñ

magar nasīb ho kyuuñ kar pyaas hī kam hai

abhī kamāl ko pahuñchī nahīñ hai fitrat-e-'ishq

ki aadmī ko hanūz intizār-e-ādam hai

junūñ bhī saath na de ab to kuchh nahīñ parvā

ḳhushā ki terī nigāhoñ se rabt mohkam hai

jo gosh-e-dil-shinau ho to bazm-e-hastī meñ

sukūt-e-sāz bhī ik naġhma-e-mujassam hai

ḳhushī meñ bhuul na jaanā jigar ye rāz-e-hayāt

ki jo ḳhushī hai yahāñ ik amānat-e-ġham hai

agar jamal-e-haqiqat se rabt mohkam hai

nafas nafas mein nai zindagi ka 'alam hai

na koi KHar na zahid koi jahannam hai

KHud apni-apni nazar apna-apna 'alam hai

har ek qatre mein dariya-e-ma’arifat hai rawan

magar nasib ho kyun kar pyas hi kam hai

abhi kamal ko pahunchi nahin hai fitrat-e-'ishq

ki aadmi ko hanuz intizar-e-adam hai

junun bhi sath na de ab to kuchh nahin parwa

KHusha ki teri nigahon se rabt mohkam hai

jo gosh-e-dil-shinau ho to bazm-e-hasti mein

sukut-e-saz bhi ek naghma-e-mujassam hai

KHushi mein bhul na jaana jigar ye raaz-e-hayat

ki jo KHushi hai yahan ek amanat-e-gham hai