is qadar aankhen meri mahw-e-tamasha ho gain

is qadar āñkheñ mirī mahv-e-tamāshā ho ga.iiñ

putliyāñ pathrā ke āḳhir sañg-e-mūsā ho ga.iiñ

rū-e-rañgīñ se bhī vo gesū-e-ḳhat hai dil-fareb

būiyāñ bhī is gulistāñ kī tamāshā ho ga.iiñ

baaġh ko sarsabz bārān-e-bahārī ne kiyā

shā.iqoñ ke vāste tasbīh ye paidā ho ga.iiñ

sūrat-e-kāfūr boveñ us kī ab uḌtī to haiñ

chashma-e-ḳhurshīd tak pahuñchīñ to dariyā ho ga.iiñ

jis taraf saude meñ un zulfoñ ke maiñ vahshī huā

us taraf se do balā.eñ mere paidā ho ga.iiñ

qaaf meñ bhī sikka baiThā husn-e-’ālamgīr kā

'ātish' apne yaar kī pariyāñ bhī shaidā ho ga.iiñ

is qadar aankhen meri mahw-e-tamasha ho gain

putliyan pathra ke aaKHir sang-e-musa ho gain

ru-e-rangin se bhi wo gesu-e-KHat hai dil-fareb

buiyan bhi is gulistan ki tamasha ho gain

bagh ko sarsabz baran-e-bahaari ne kiya

shaiqon ke waste tasbih ye paida ho gain

surat-e-kafur bowen us ki ab uDti to hain

chashma-e-KHurshid tak pahunchin to dariya ho gain

jis taraf saude mein un zulfon ke main wahshi hua

us taraf se do balaen mere paida ho gain

qaf mein bhi sikka baiTha husn-e-’alamgir ka

'atish' apne yar ki pariyan bhi shaida ho gain