دل بیتاب نے تم کو پکارا ہے چلے آؤ

دل بیتاب نے تم کو پکارا ہے چلے آؤ

تمہارے ہجر نے ہم کو سنوارا ہے چلے آؤ

تمہارے بن ہر اک موسم خزاں معلوم ہوتا ہے

نہیں ہو تم تو ہر منظر دھواں معلوم ہوتا ہے

تمہارے بن بہت مشکل گزارا ہے چلے آؤ

دل بیتاب نے تم کو پکارا ہے چلے آؤ

تمہاری یاد کا ہر پل بڑی مشکل سے گزرا ہے

یہ دیوانہ بہت مایوس کن منزل سے گزرا ہے

یہاں تم بن خسارہ ہی خسارا ہے چلے آؤ

دل بیتاب نے تم کو پکارا ہے چلے آؤ

تمہارے بن مری دنیا بہت ویران لگتی ہے

نہ شمع ہے نہ محفل میں ہی کوئی جان لگتی ہے

سبھی کچھ ہم نے تم پر ہی تو وارا ہے چلے آؤ

دل بیتاب نے تم کو پکارا ہے چلے آؤ

مرا دل بھی تڑپ کر آج سمجھانے لگا مجھ کو

تمہارا عکس ہر جانب نظر آنے لگا مجھ کو

تمہارا ساتھ ہی ہر شے سے پیارا ہے چلے آؤ

دل بیتاب نے تم کو پکارا ہے چلے آؤ

کبھی سوچا نہ تھا میں نے کہ ایسا دن بھی آئے گا

تمہاری یاد کا موسم مجھے اتنا ستائے گا

مجھے فرقت کے لمحوں نے ہی مارا ہے چلے آؤ

دل بیتاب نے تم کو پکارا ہے چلے آؤ

سر محفل تمہارے حسن کا صدقہ اتاروں گا

تمہارے وصل سے اپنی محبت کو نکھاروں گا

بھنور میں میری الفت کا ستارہ ہے چلے آؤ

دل بیتاب نے تم کو پکارا ہے چلے آؤ