koi maza maza nahin koi KHushi KHushi nahin

koī maza maza nahīñ koī ḳhushī ḳhushī nahīñ

tere baġhair zindagī maut hai zindagī nahīñ

haal meñ apne mast huuñ ġhair kā hosh hī nahīñ

rahtā huuñ maiñ jahāñ meñ yuuñ jaise yahāñ koī nahīñ

mujh meñ sabhī hunar sahī taab to zabt kī nahīñ

shart-e-vafā vahāñ yahī aur yahāñ yahī nahīñ

dil kī lagī hai 'āshiqo ye koī dil-lagī nahīñ

hañs na sakoge go hañso 'ishq hai ye hañsī nahīñ

baiThā huuñ maiñ jhukā.e sar nīchī kiye hue nazar

bazm meñ sab sahī magar vo jo nahīñ koī nahīñ

hosh na jaane thā kidhar sochā to ab huī ḳhabar

bāteñ hazār kiiñ magar dil meñ thī kahī nahīñ

rahtā huuñ be-lab-o-dahan roz-o-shab un se ham-suḳhan

jān-e-suḳhan hai ai 'hasan' ye mirī ḳhāmushī nahīñ

koi maza maza nahin koi KHushi KHushi nahin

tere baghair zindagi maut hai zindagi nahin

haal mein apne mast hun ghair ka hosh hi nahin

rahta hun main jahan mein yun jaise yahan koi nahin

mujh mein sabhi hunar sahi tab to zabt ki nahin

shart-e-wafa wahan yahi aur yahan yahi nahin

dil ki lagi hai 'ashiqo ye koi dil-lagi nahin

hans na sakoge go hanso 'ishq hai ye hansi nahin

baiTha hun main jhukae sar nichi kiye hue nazar

bazm mein sab sahi magar wo jo nahin koi nahin

hosh na jaane tha kidhar socha to ab hui KHabar

baaten hazar kin magar dil mein thi kahi nahin

rahta hun be-lab-o-dahan roz-o-shab un se ham-suKHan

jaan-e-suKHan hai ai 'hasan' ye meri KHamushi nahin