maddah hun janab-e-risalat panah ka

maddāh huuñ janāb-e-risālat panāh kā

'arsh-e-barīñ pe gosha hai merī kulāh kā

mahfil meñ merī naġhma-sarā.ī se shor hai

har samt aah aah kā aur vaah vaah kā

zebā hai fakHr-o-nāz mujhe jis qadar karūñ

dekhūñ to mad.h-ḳhvāñ huuñ maiñ kis bādshāh kā

dariyā-e-faiz-o-jūd hai vo jiske sāmne

tinke se kam hai koh bhī gar ho gunāh kā

us jaayā 'uzr-ḳhvāhī hamārī karegā vo

jis jā pe zahrā-āb ho har 'uzr-ḳhvāh kā

paiġhambaroñ ko fakHr huā us kī zaat se

sardār hī se baḌhtā hai rutba sipāh kā

sarsabz kyā hoñ us ruḳh-e-zebā ke rū-ba-rū

muñh kyā hai sham'-e-bazm kā yā mehr-o-māh kā

shabnam kī kyā majāl jo gul-gasht kar sake

jis gulistāñ meñ paañv na Thahre nigāh kā

āshiq ke dil se aah nikaltī hai isliye

us ke sivā maqām nahīñ dil meñ aah kā

kālak to mere muñh kī chhaTe ab kisī tarah

hove guzar madīne meñ mujh rū-siyāh kā

dar-pesh hai 'adam kā safar sab ko dosto

jo naa't kā kalām hai tosha hai raah kā

paiġhambaroñ kā shāhid-e-'ādil hai vo 'shahīd'

kyā martaba hai nām-e-ḳhudā us gavāh kā

maddah hun janab-e-risalat panah ka

'arsh-e-barin pe gosha hai meri kulah ka

mahfil mein meri naghma-sarai se shor hai

har samt aah aah ka aur wah wah ka

zeba hai fakHr-o-naz mujhe jis qadar karun

dekhun to madh-KHwan hun main kis baadshah ka

dariya-e-faiz-o-jud hai wo jiske samne

tinke se kam hai koh bhi gar ho gunah ka

us jaya 'uzr-KHwahi hamari karega wo

jis ja pe zahra-ab ho har 'uzr-KHwah ka

paighambaron ko fakHr hua us ki zat se

sardar hi se baDhta hai rutba sipah ka

sarsabz kya hon us ruKH-e-zeba ke ru-ba-ru

munh kya hai sham'-e-bazm ka ya mehr-o-mah ka

shabnam ki kya majal jo gul-gasht kar sake

jis gulistan mein panw na Thahre nigah ka

aashiq ke dil se aah nikalti hai isliye

us ke siwa maqam nahin dil mein aah ka

kalak to mere munh ki chhaTe ab kisi tarah

howe guzar madine mein mujh ru-siyah ka

dar-pesh hai 'adam ka safar sab ko dosto

jo na't ka kalam hai tosha hai rah ka

paighambaron ka shahid-e-'adil hai wo 'shahid'

kya martaba hai nam-e-KHuda us gawah ka