tasawwur mein jo phulon ka saman hai

tasavvur meñ jo phūloñ kā samāñ hai

qafas kī shaam sub.h gulistāñ hai

jigar kā ḳhuun āñkhoñ se ravāñ hai

mohabbat ek rañgīñ dāstāñ hai

mirī fariyād dil kī dāstāñ hai

mirā naala mohabbat kī zabāñ hai

tasavvur aish kā rāhat-nishāñ hai

magar itnī mujhe fursat kahāñ hai

takallum hai ki maujoñ kī ravānī

tabassum hai ki sub.h-e-gulsitāñ hai

javānī aur phir terī javānī

tire sadqe meñ ik duniyā javāñ hai

jhukī paḌtī haiñ sajde meñ jabīneñ

ḳhudā jaane ye kis kā āstāñ hai

vo shāḳheñ jin pe merā āshiyāñ thā

vahāñ ab bijliyoñ kā āshiyāñ hai

bahut se dahr meñ qātil adā haiñ

tumhīñ se kyuuñ zamāna bad-gumāñ hai

na pūchho shām-e-tanhā.ī kā a.alam

tumhārī yaad bhī dāman-kashāñ hai

tirī bedād kā shikvā nahīñ hai

mirī fitrat hī majbūr-e-fuġhāñ hai

ḳhudā vo din na laa.e jo kahūñ maiñ

gunāhoñ meñ bhī ab lazzat kahāñ hai

are ik sāġhar-e-sahbā kā a.alam

abhī mai-kash kahāñ thā aur kahāñ hai

mirā afsāna-e-pur-dard 'māhir'

ba-unvān-e-hadīs-e-dīgrāñ hai

tasawwur mein jo phulon ka saman hai

qafas ki sham subh gulistan hai

jigar ka KHun aankhon se rawan hai

mohabbat ek rangin dastan hai

meri fariyaad dil ki dastan hai

mera nala mohabbat ki zaban hai

tasawwur aish ka rahat-nishan hai

magar itni mujhe fursat kahan hai

takallum hai ki maujon ki rawani

tabassum hai ki subh-e-gulsitan hai

jawani aur phir teri jawani

tere sadqe mein ek duniya jawan hai

jhuki paDti hain sajde mein jabinen

KHuda jaane ye kis ka aastan hai

wo shaKHen jin pe mera aashiyan tha

wahan ab bijliyon ka aashiyan hai

bahut se dahr mein qatil ada hain

tumhin se kyun zamana bad-guman hai

na puchho sham-e-tanhai ka aalam

tumhaari yaad bhi daman-kashan hai

teri bedad ka shikwa nahin hai

meri fitrat hi majbur-e-fughan hai

KHuda wo din na lae jo kahun main

gunahon mein bhi ab lazzat kahan hai

are ek saghar-e-sahba ka aalam

abhi mai-kash kahan tha aur kahan hai

mera afsana-e-pur-dard 'mahir'

ba-unwan-e-hadis-e-digran hai