husn ki KHwabida mahfil ko jaga deta hun main

husn kī ḳhvābīda mahfil ko jagā detā huuñ maiñ

kis bulandī se ḳhudā jaane sadā detā huuñ maiñ

dard-e-dil kā naam sun kar muskurā detā huuñ maiñ

apnī barbādī kā afsāna sunā detā huuñ maiñ

mā-sivā ke har tasavvur ko miTā detā huuñ maiñ

aarzū ko ḳhaak meñ ḳhud hī milā detā huuñ maiñ

allāh allāh mere dast-e-shauq kī gustāḳhiyāñ

un kī bazm ke parde uThā detā huuñ maiñ

kyā ḳhabar duzdīda nazroñ se vo kyā farmā ga.e

roz ek ummīd kī mahfil sajā detā huuñ maiñ

mubtalā-e-kashmakash hai kab se qalb-e-nā-tavāñ

ek chiñgārī ko muddat se havā detā huuñ maiñ

rahm khātī haiñ ḳhudā.ī par mirī māyūsiyāñ

valvale uThne nahīñ paate dabā detā huuñ maiñ

aaj bhī qaa.im huuñ apnī vaz.a par tere liye

ab bhī terī raah meñ āñḳheñ bichhā detā huuñ maiñ

is tire raushan tabassum kā fasāna chheḌ kar

mahfiloñ meñ husn kī sham.a jalā detā huuñ maiñ

jab kabhī hotā hai dil āmāda-e-izhār-e-ġham

sunñe vāloñ ke kalejoñ ko hilā detā huuñ maiñ

kyā ġharaz mujh ko kisī se mujh ko to matlūb hai

rāh-e-ulfat se haram ko bhī haTā detā huuñ maiñ

chāhtā huuñ dekhnā jab zohd kī mahfil kā rañg

ḳhud ko isyāñ kī bulandī se girā detā huuñ maiñ

mere zauq-e-sarfaroshī ko ḳhudā puurā kare

naam se kar teġh kā gardan jhukā detā huuñ maiñ

ab maiñ un ke jor kā shikvā bhī kar saktā nahīñ

vo ye kahte haiñ tujhe dād-e-vafā detā huuñ maiñ

aur kuchh masrūf nahīñ 'māhir' mire ash.ār kā

dard se labrez ik naġhma sunā detā huuñ maiñ

husn ki KHwabida mahfil ko jaga deta hun main

kis bulandi se KHuda jaane sada deta hun main

dard-e-dil ka nam sun kar muskura deta hun main

apni barbaadi ka afsana suna deta hun main

ma-siwa ke har tasawwur ko miTa deta hun main

aarzu ko KHak mein KHud hi mila deta hun main

allah allah mere dast-e-shauq ki gustaKHiyan

un ki bazm ke parde uTha deta hun main

kya KHabar duzdida nazron se wo kya farma gae

roz ek ummid ki mahfil saja deta hun main

mubtala-e-kashmakash hai kab se qalb-e-na-tawan

ek chingari ko muddat se hawa deta hun main

rahm khati hain KHudai par meri mayusiyan

walwale uThne nahin pate daba deta hun main

aaj bhi qaim hun apni waza par tere liye

ab bhi teri rah mein aanKHen bichha deta hun main

is tere raushan tabassum ka fasana chheD kar

mahfilon mein husn ki shama jala deta hun main

jab kabhi hota hai dil aamada-e-izhaar-e-gham

sunne walon ke kalejon ko hila deta hun main

kya gharaz mujh ko kisi se mujh ko to matlub hai

rah-e-ulfat se haram ko bhi haTa deta hun main

chahta hun dekhna jab zohd ki mahfil ka rang

KHud ko isyan ki bulandi se gira deta hun main

mere zauq-e-sarfaroshi ko KHuda pura kare

nam se kar tegh ka gardan jhuka deta hun main

ab main un ke jor ka shikwa bhi kar sakta nahin

wo ye kahte hain tujhe dad-e-wafa deta hun main

aur kuchh masruf nahin 'mahir' mere ashaar ka

dard se labrez ek naghma suna deta hun main