shab-e-furqat ki tariki mein shamil hai ghubar apna

shab-e-furqat kī tārīkī meñ shāmil hai ġhubār apnā

usī sahrā meñ khoyā 'ishq ne 'ahd-e-bahār apnā

miTā gulshan to uTh kar ḳhāk-e-gul se ham kahāñ jaate

jahāñ gulshan thā pahle ab vahīñ par hai mazār apnā

tire jalvoñ meñ gum huuñ yā tirī furqat meñ miT jaa.eñ

ye ham samjhe hue haiñ hai fanā anjām-e-kār apnā

hujūm-e-yās meñ be-gāngī kā shikvā kis se ho

na ham apne na dil apnā na jaañ apnī na yaar apnā

kahāñ ab vo surūr-e-daur-e-avval bazm-e-hastī meñ

jise kahte haiñ duniyā hai vo ai 'maikash' ḳhumār apnā

shab-e-furqat ki tariki mein shamil hai ghubar apna

usi sahra mein khoya 'ishq ne 'ahd-e-bahaar apna

miTa gulshan to uTh kar KHak-e-gul se hum kahan jate

jahan gulshan tha pahle ab wahin par hai mazar apna

tere jalwon mein gum hun ya teri furqat mein miT jaen

ye hum samjhe hue hain hai fana anjam-e-kar apna

hujum-e-yas mein be-gangi ka shikwa kis se ho

na hum apne na dil apna na jaan apni na yar apna

kahan ab wo surur-e-daur-e-awwal bazm-e-hasti mein

jise kahte hain duniya hai wo ai 'maikash' KHumar apna