شب فرقت کی تاریکی میں شامل ہے غبار اپنا

شب فرقت کی تاریکی میں شامل ہے غبار اپنا

اسی صحرا میں کھویا عشق نے عہد بہار اپنا

مٹا گلشن تو اٹھ کر خاک گل سے ہم کہاں جاتے

جہاں گلشن تھا پہلے اب وہیں پر ہے مزار اپنا

ترے جلووں میں گم ہوں یا تری فرقت میں مٹ جائیں

یہ ہم سمجھے ہوئے ہیں ہے فنا انجام کار اپنا

ہجوم یاس میں بے گانگی کا شکوہ کس سے ہو

نہ ہم اپنے نہ دل اپنا نہ جاں اپنی نہ یار اپنا

کہاں اب وہ سرور دور اول بزم ہستی میں

جسے کہتے ہیں دنیا ہے وہ اے میکشؔ خمار اپنا