main dang hun apne mein hairat use kahte hain

maiñ dañg huuñ apne meñ hairat use kahte haiñ

paatā huuñ jahāñ ḳhud meñ vahdat use kahte haiñ

kar jam.a tū tanzīh-o-tashbīh ko ai suufī

batlā.ūñ maiñ phir tujh ko hujjat use kahte haiñ

maiñ donoñ jahāñ meñ huuñ haiñ donoñ jahāñ mujh meñ

vahdat use kahte haiñ kasrat use kahte haiñ

hai ain na ḳhud zāhir hai ġhair na ḳhud qāyam

ham is ko samajhte haiñ hikmat ise kahte haiñ

haiñ jam.a meñ ham aur phir haiñ jam.a se ḳhālī ham

jalvat use kahte haiñ ḳhalvat use kahte haiñ

qatra kahīñ dariyā hai dariyā kahīñ qatra hai

jo raaz samajhte haiñ qudrat use kahte haiñ

mad-hoshī meñ lā kī ham 'ġhausī' bahut achchhe the

kyā banda banāyā hai ulfat use kahte haiñ

main dang hun apne mein hairat use kahte hain

pata hun jahan KHud mein wahdat use kahte hain

kar jama tu tanzih-o-tashbih ko ai sufi

batlaun main phir tujh ko hujjat use kahte hain

main donon jahan mein hun hain donon jahan mujh mein

wahdat use kahte hain kasrat use kahte hain

hai ain na KHud zahir hai ghair na KHud qayam

hum is ko samajhte hain hikmat ise kahte hain

hain jama mein hum aur phir hain jama se KHali hum

jalwat use kahte hain KHalwat use kahte hain

qatra kahin dariya hai dariya kahin qatra hai

jo raaz samajhte hain qudrat use kahte hain

mad-hoshi mein la ki hum 'ghausi' bahut achchhe the

kya banda banaya hai ulfat use kahte hain