تمہارے کوچے میں آکے اے جاں نماز ہم یوں ادا کریں گے

تمہارے کوچے میں آکے اے جاں نماز ہم یوں ادا کریں گے

تمہی کو پوجیں گے دم بہ دم ہم تمہی کو سجدہ کیا کریں گے

عطا کیا ہے جو درد تم نے، اسے نہ دل سے جدا کریں گے

نہ باز آئیں گے غم سے تیرے، نہ غم کی تیرے دوا کریں گے

نئی ادائیں کوئی دکھائے، ہزار رستے کوئی بتائے

ہمیں سکھایا ہے جس نے مٹنا، ہم اس پہ ایماں فدا کریں گے

اگر ہیں ہم تجھ پر مرنے والے، اگر ہیں ہم تیرے سچے عاشق

نہ اٹھنے دیں گے دھواں جگر سے، ہزار غم سے جلا کریں گے

تری خوشی میں بس ہم بھی خوش ہیں رضا میں ہم بھی ہیں تیری راضی

زباں چلائیں گے ہم نہ تجھ سے، نہ تیرا کوئی گلا کریں گے

حضور ان کی قبول ہوگی، انہی کے ہوں گے بہشت و کوثر

جو تیری محفل میں آکے اے جاں نظر کے ساغر پیا کریں گے

کبھی نہ چھوڑیں گے اس کا دامن، جو ہے سراپا متاعِ ایماں

نہ کام منظورؔ آسکے جو ہم ایسی دولت کا کیا کریں گے