na kisi chiz mein dil un ka laga mere baad

na kisī chiiz meñ dil un kā lagā mere baa'd

yaad aatī hī rahī merī vafā mere baa'd

ab to maiñ rāh-rau mulk-e-'adam hotā huuñ

tirā har haal meñ hāfiz hai ḳhudā mere baa'd

chhoḌ kar mujh ko agar jaate ho jaao lekin

na milegā tumheñ pāband-e-vafā mere baa'd

jaan pyārī hai to tum pyaar kisī se na karo

koī 'ushshāq meñ kar de ye nidā mere baa'd

be tire meñ to taḌaptā hī rahā raat tamām

sach batā de tirā kyā haal huā mere baa'd

maiñ jo martā huuñ balā se mujhe mar jaane de

to burā haal ḳhudārā na banā mere baa'd

maktab-e-'ishq meñ mā'lūm nahīñ legā kaun

dars-e-uftādgī-o-dars-e-fanā mere baa'd

apne marne kī nahīñ fikr mujhe fikr ye hai

kaun uThā.egā tire jaur-o-jafā mere baa'd

zindagī bhar koī 'hasrat' na nikālī dil kī

nauha karte hue gar aa.e to kyā mere baa'd

na kisi chiz mein dil un ka laga mere ba'd

yaad aati hi rahi meri wafa mere ba'd

ab to main rah-rau mulk-e-'adam hota hun

tera har haal mein hafiz hai KHuda mere ba'd

chhoD kar mujh ko agar jate ho jao lekin

na milega tumhein paband-e-wafa mere ba'd

jaan pyari hai to tum pyar kisi se na karo

koi 'ushshaq mein kar de ye nida mere ba'd

be tere mein to taDapta hi raha raat tamam

sach bata de tera kya haal hua mere ba'd

main jo marta hun bala se mujhe mar jaane de

to bura haal KHudara na bana mere ba'd

maktab-e-'ishq mein ma'lum nahin lega kaun

dars-e-uftadgi-o-dars-e-fana mere ba'd

apne marne ki nahin fikr mujhe fikr ye hai

kaun uThaega tere jaur-o-jafa mere ba'd

zindagi bhar koi 'hasrat' na nikali dil ki

nauha karte hue gar aae to kya mere ba'd