نہ کسی چیز میں دل ان کا لگا میرے بعد

نہ کسی چیز میں دل ان کا لگا میرے بعد

یاد آتی ہی رہی میری وفا میرے بعد

اب تو میں راہ رو ملک عدم ہوتا ہوں

ترا ہر حال میں حافظ ہے خدا میرے بعد

چھوڑ کر مجھ کو اگر جاتے ہو جاؤ لیکن

نہ ملے گا تمہیں پابند وفا میرے بعد

جان پیاری ہے تو تم پیار کسی سے نہ کرو

کوئی عشاق میں کر دے یہ ندا میرے بعد

بے ترے میں تو تڑپتا ہی رہا رات تمام

سچ بتا دے ترا کیا حال ہوا میرے بعد

میں جو مرتا ہوں بلا سے مجھے مر جانے دے

تو برا حال خدارا نہ بنا میرے بعد

مکتب عشق میں معلوم نہیں لے گا کون

درس افتادگی و درس فنا میرے بعد

اپنے مرنے کی نہیں فکر مجھے فکر یہ ہے

کون اٹھائے گا ترے جور و جفا میرے بعد

زندگی بھر کوئی حسرتؔ نہ نکالی دل کی

نوحہ کرتے ہوئے گر آئے تو کیا میرے بعد