nahin hun kuchh bhi magar kya kahun ki kya hun main

nahīñ huuñ kuchh bhī magar kyā kahūñ ki kyā huuñ maiñ

fazā-e-quds kī gūñjī huī sadā huuñ maiñ

jo aa ke dil se na nikle vo mudda'ā huuñ maiñ

Tapaktī yaas ho jis se vo iltijā huuñ maiñ

har ek rañg meñ paatā huuñ kuchh jhalak terī

zarā jo ġhaur kī nazroñ se dekhtā huuñ maiñ

tajalliyoñ se tirī jagmagā uThe zarre

tujhe ḳhabar hai ki kab se taḌap rahā huuñ maiñ

junūn-e-shauq meñ kuchh aisī merī hālat hai

ki apnī bātoñ pe ḳhud vajd kar rahā huuñ maiñ

irāda ek bhī puurā na ho sakā afsos

vo dardmañd-e-alam ḳhūgar-e-vafā huuñ maiñ

khulā ye merī haqīqat kā mudda'ā 'muḳhtār'

ajal nasīb hoñ parvarda-e-fanā huuñ maiñ

nahin hun kuchh bhi magar kya kahun ki kya hun main

faza-e-quds ki gunji hui sada hun main

jo aa ke dil se na nikle wo mudda'a hun main

Tapakti yas ho jis se wo iltija hun main

har ek rang mein pata hun kuchh jhalak teri

zara jo ghaur ki nazron se dekhta hun main

tajalliyon se teri jagmaga uThe zarre

tujhe KHabar hai ki kab se taDap raha hun main

junun-e-shauq mein kuchh aisi meri haalat hai

ki apni baaton pe KHud wajd kar raha hun main

irada ek bhi pura na ho saka afsos

wo dardmand-e-alam KHugar-e-wafa hun main

khula ye meri haqiqat ka mudda'a 'muKHtar'

ajal nasib hon parwarda-e-fana hun main