نہیں ہوں کچھ بھی مگر کیا کہوں کہ کیا ہوں میں

نہیں ہوں کچھ بھی مگر کیا کہوں کہ کیا ہوں میں

فضائے قدس کی گونجی ہوئی صدا ہوں میں

جو آ کے دل سے نہ نکلے وہ مدعا ہوں میں

ٹپکتی یاس ہو جس سے وہ التجا ہوں میں

ہر ایک رنگ میں پاتا ہوں کچھ جھلک تیری

ذرا جو غور کی نظروں سے دیکھتا ہوں میں

تجلیوں سے تری جگمگا اٹھے ذرے

تجھے خبر ہے کہ کب سے تڑپ رہا ہوں میں

جنون شوق میں کچھ ایسی میری حالت ہے

کہ اپنی باتوں پہ خود وجد کر رہا ہوں میں

ارادہ ایک بھی پورا نہ ہو سکا افسوس

وہ دردمند الم خوگر وفا ہوں میں

کھلا یہ میری حقیقت کا مدعا مختارؔ

اجل نصیب ہوں پروردۂ فنا ہوں میں