جب اہل خرد دیر و حرم ڈھونڈھ رہے تھے

جب اہل خرد دیر و حرم ڈھونڈھ رہے تھے

دیوانے تیرا نقش قدم ڈھونڈھ رہے تھے

زاہد تو عبادت کا بھرم ڈھونڈھ رہے تھے

اک ہم تھے تیری چشم کرم ڈھونڈھ رہے تھے

محشر میں تو مخلوق دواں سوئے جناں تھی

اس وقت بھی ہم تم کو صنم ڈھونڈھ رہے تھے

نظروں سے نظر ملتے ہی کچھ حال تھا ایسا

دل اور جگر خود کو بہم ڈھونڈھ رہے تھے

اے حسن جہاں سوز جہاں دید جہاں داد

تشبیہ تیری اہل قلم ڈھونڈھ رہے تھے