بت میں بھی ترا یا رب جلوا نظر آتا ہے

بت میں بھی ترا یا رب جلوا نظر آتا ہے

بت خانے کے پردے میں کعبا نظر آتا ہے

ساقی کی محبت میں دل صاف ہوا اتنا

جب سر کو جھکاتا ہوں شیشا نظر آتا ہے

اے عشق کہیں لے چل یہ دیر و حرم چھوٹیں

ان دونو مکانوں میں جھگڑا نظر آتا ہے

معشوق کے رتبے کو محشر میں کوئی دیکھے

اللہ بھی مجنوں کو لیلیٰ نظر آتا ہے

مضطرؔ مری آنکھوں پر وہ دستِ ادا رکھیں

پھر مجھے سے وہ یہ پوچھیں اب کیا نظر آتا ہے