baKHt-e-KHufta ko jaga lun to chale jaiyega

baḳht-e-ḳhufta ko jagā luuñ to chale jā.iyegā

apnī bigḌī ko banā luuñ to chale jā.iyegā

ek nazar dekhne kī aur bhī ik hasrat hai

maiñ zarā hosh meñ aa luuñ to chale jā.iyegā

aap ke baa'd ye dil-e-zindagī kar degā harām

pahle maiñ jaan se jā luuñ to chale jā.iyegā

dil meñ ab rahne kī haamī nahīñ bhartā koī

nā-murādī ko bulā luuñ to chale jā.iyegā

kHvāhish-o-ārzū hasrat-o-armān-o-ummīd

ḳhaak meñ sab ko milā luuñ to chale jā.iyegā

tifl-e-dil nāzoñ kā paalā hai machal jā.egā

is se kuchh baat banā luuñ to chale jā.iyegā

kaun aisā hai milegā jo dil-e-vīrāñ meñ

aag us ghar ko lagā luuñ to chale jā.iyegā

aap ke sharbat-e-dīdār kā pyāsā hai ye dil

tishnagī us kī bujhā luuñ to chale jā.iyegā

sūrat-e-hastī-e-mauhūm ‘nisār’-e-ḳhasta

aap ke aage miTā luuñ to chale jā.egā

baKHt-e-KHufta ko jaga lun to chale jaiyega

apni bigDi ko bana lun to chale jaiyega

ek nazar dekhne ki aur bhi ek hasrat hai

main zara hosh mein aa lun to chale jaiyega

aap ke ba'd ye dil-e-zindagi kar dega haram

pahle main jaan se ja lun to chale jaiyega

dil mein ab rahne ki hami nahin bharta koi

na-muradi ko bula lun to chale jaiyega

kHwahish-o-arzu hasrat-o-arman-o-ummid

KHak mein sab ko mila lun to chale jaiyega

tifl-e-dil nazon ka pala hai machal jaega

is se kuchh baat bana lun to chale jaiyega

kaun aisa hai milega jo dil-e-viran mein

aag us ghar ko laga lun to chale jaiyega

aap ke sharbat-e-didar ka pyasa hai ye dil

tishnagi us ki bujha lun to chale jaiyega

surat-e-hasti-e-mauhum ‘nisar’-e-KHasta

aap ke aage miTa lun to chale jaega