baDe bol baDe niwale

ḳhudā gavāh takabbur se jis ko pyaar huā

samajh lo bas vahī insāñ zalīl-o-ḳhvār huā

baḌe bol baḌe nivāle

halaq meñ ik din phañsne vaale

kaisī kaisī hastiyoñ ne is jahāñ meñ aan ke

kHuub naqqāre bajā.e apnī apnī shaan ke

koī itrātā thā apnī shohrat-o-jāgīr par

thā kisī ko faḳhr apnī daulat-o-tauqīr par

zulm Dhāne meñ koi be-intihā maqbūl thā

koī shuġhl-e-mai-kashī meñ rāt-din mashġhūl thā

kar rahā thā koī apnī quvvat-e-bāzū pe naaz

chand roza zindagī se thā koī be-niyāz

maut lagā ga.ī muñh par taale

baḌe bol aur baḌe nivāle

baat az rāh-e-karam parvāz kī sun lījiye

zindagī meñ kaam aa.egī use chun lījiye

chhoTā muñh bāteñ baḌī hargiz na karnā chāhiye

lāzim hai har baat kī tah meñ utarnā chāhiye

zehn se insān ke jab bāhar nikal jaatī hai baat

dar-haqīqat ziist kā naqsha badal jaatī hai baat

aadmī ko chāhiye ki bolne se peshtar

ġhaur se jumloñ ko taule taulne se peshtar

soche samjhe dekhe bhāle

baḌe bol aur baḌe nivāle

KHuda gawah takabbur se jis ko pyar hua

samajh lo bas wahi insan zalil-o-KHwar hua

baDe bol baDe niwale

halaq mein ek din phansne wale

kaisi kaisi hastiyon ne is jahan mein aan ke

kHub naqqare bajae apni apni shan ke

koi itraata tha apni shohrat-o-jagir par

tha kisi ko faKHr apni daulat-o-tauqir par

zulm Dhane mein koi be-intiha maqbul tha

koi shughl-e-mai-kashi mein raat-din mashghul tha

kar raha tha koi apni quwwat-e-bazu pe naz

chand roza zindagi se tha koi be-niyaz

maut laga gai munh par tale

baDe bol aur baDe niwale

baat az rah-e-karam parwaz ki sun lijiye

zindagi mein kaam aaegi use chun lijiye

chhoTa munh baaten baDi hargiz na karna chahiye

lazim hai har baat ki tah mein utarna chahiye

zehn se insan ke jab bahar nikal jati hai baat

dar-haqiqat zist ka naqsha badal jati hai baat

aadmi ko chahiye ki bolne se peshtar

ghaur se jumlon ko taule taulne se peshtar

soche samjhe dekhe bhaale

baDe bol aur baDe niwale