laila ki taraf tak na mahmil ki taraf dekh

lailā kī taraf taak na mahmil kī taraf dekh

ai 'qais' jo hai zauq-e-nazar dil kī taraf dekh

dariyā pe nazar Daal na sāhil kī taraf dekh

dil meñ hai kamī kaun sī tū dil kī taraf dekh

maujoñ kī na tūfān kī na sāhil kī taraf dekh

sab kuchh hai isī bahr meñ tū dil kī taraf dekh

duniyā ke manāzir to haiñ duniyā ke manāzir

tū dil kī taraf dil kī taraf dil kī taraf dekh

kab tak ye nazar sū-e-haram nāseh-e-nādāñ

ai 'aql ke andhe haram-e-dil kī taraf dekh

mehr-o-mah-o-anjum bhī gul-o-sar-o-saman bhī

sab kuchh isī dil meñ hai isī dil kī taraf dekh

ai gulshan-e-'ālam kī taraf dekhne vaale

dil ġhairat-e-firdaus hai tū dil kī taraf dekh

kyā tuur ke jalvoñ kī taraf dekh rahā hai

dil meñ tire kyā kuchh nahīñ tū dil kī taraf dekh

phir dekh ye zarra hai ki ḳhurshīd hai koī

uTh aañkh uThā aur zarā dil kī taraf dekh

hairat-zada kyuuñ jānib-e-dar dekh rahā hai

dil-jalva-gah-e-ḳhās hai tū dil kī taraf dekh

ye dāman-e-sad-chāk hai vo sīna-e-sad-chāk

phūloñ kī taraf taak anādil kī taraf dekh

mahmil kī taraf 'qais' abas haiñ tirī nazreñ

lailā kī talab hai to zarā dil kī taraf dekh

laila ki taraf tak na mahmil ki taraf dekh

ai 'qais' jo hai zauq-e-nazar dil ki taraf dekh

dariya pe nazar Dal na sahil ki taraf dekh

dil mein hai kami kaun si tu dil ki taraf dekh

maujon ki na tufan ki na sahil ki taraf dekh

sab kuchh hai isi bahr mein tu dil ki taraf dekh

duniya ke manazir to hain duniya ke manazir

tu dil ki taraf dil ki taraf dil ki taraf dekh

kab tak ye nazar su-e-haram naseh-e-nadan

ai 'aql ke andhe haram-e-dil ki taraf dekh

mehr-o-mah-o-anjum bhi gul-o-sar-o-saman bhi

sab kuchh isi dil mein hai isi dil ki taraf dekh

ai gulshan-e-'alam ki taraf dekhne wale

dil ghairat-e-firdaus hai tu dil ki taraf dekh

kya tur ke jalwon ki taraf dekh raha hai

dil mein tere kya kuchh nahin tu dil ki taraf dekh

phir dekh ye zarra hai ki KHurshid hai koi

uTh aankh uTha aur zara dil ki taraf dekh

hairat-zada kyun jaanib-e-dar dekh raha hai

dil-jalwa-gah-e-KHas hai tu dil ki taraf dekh

ye daman-e-sad-chaak hai wo sina-e-sad-chaak

phulon ki taraf tak anadil ki taraf dekh

mahmil ki taraf 'qais' abas hain teri nazren

laila ki talab hai to zara dil ki taraf dekh