لیلیٰ کی طرف تاک نہ محمل کی طرف دیکھ

لیلیٰ کی طرف تاک نہ محمل کی طرف دیکھ

اے قیسؔ جو ہے ذوق نظر دل کی طرف دیکھ

دریا پہ نظر ڈال نہ ساحل کی طرف دیکھ

دل میں ہے کمی کون سی تو دل کی طرف دیکھ

موجوں کی نہ طوفان کی نہ ساحل کی طرف دیکھ

سب کچھ ہے اسی بحر میں تو دل کی طرف دیکھ

دنیا کے مناظر تو ہیں دنیا کے مناظر

تو دل کی طرف دل کی طرف دل کی طرف دیکھ

کب تک یہ نظر سوئے حرم ناصح ناداں

اے عقل کے اندھے حرم دل کی طرف دیکھ

مہر و مہ و انجم بھی گل و سر و سمن بھی

سب کچھ اسی دل میں ہے اسی دل کی طرف دیکھ

اے گلشن عالم کی طرف دیکھنے والے

دل غیرت فردوس ہے تو دل کی طرف دیکھ

کیا طور کے جلووں کی طرف دیکھ رہا ہے

دل میں ترے کیا کچھ نہیں تو دل کی طرف دیکھ

پھر دیکھ یہ ذرہ ہے کہ خورشید ہے کوئی

اٹھ آنکھ اٹھا اور ذرا دل کی طرف دیکھ

حیرت زدہ کیوں جانب در دیکھ رہا ہے

دل جلوہ گہ خاص ہے تو دل کی طرف دیکھ

یہ دامن صد چاک ہے وہ سینۂ صد چاک

پھولوں کی طرف تاک عنادل کی طرف دیکھ

محمل کی طرف قیسؔ عبث ہیں تری نظریں

لیلیٰ کی طلب ہے تو ذرا دل کی طرف دیکھ