زندگی ایک کرائے کا گھر ہے اک نہ اک دن بدلنا پڑے گا

زندگی ایک کرائے کا گھر ہے اک نہ اک دن بدلنا پڑے گا

موت جب تجھ کو آواز دے گی گھر سے باہر نکلنا پڑے گا

روٹھ جائے گی جب تجھ سےخوشیاں غم کے سانچےمیں ڈھالنا پڑے گا

وقت ایسا بھی آئے گا ناداں تجھ کو کانٹوں پے چلنا پڑے گا

اتنا معزور ہو جائے گا تو اتنا مجبور ہو جائے گا تو

یہ جو مخمل کا چولا ہے تیرا یہ کفن میں بدلنا پڑے گا

کر لے ایماں سے دل کی صفائی چھوڑ دے چھوڑ دے تو برائی

وقت باقی ہے اب بھی سنبھل جا ورنہ دوزخ میں جلنا پڑے گا

ایسی ہو جائے گی تیری حالت کام آئے گی نہ دولت نہ طاقت

چھوڑ کر اپنی اونچی حویلی تجھ کو باہر نکلنا پڑے گا

جلوۂ حُسن بھی جابجا ہے اور خطرات بھی ہے زیادہ

زندگانی کا یہ راستہ ہے ہر قدم پر سنبھلنا پڑے گا

باپ بیٹے یہ بھائی بھتیجےتیرے ساتھی ہیں سب جیتےجی کے

اپنے آنگن سے اٹھنا پڑے گا اپنے چوکھٹ سے ٹلنا پڑے گا

ہے بہت ہی بری چیز دنیا کیوں سمجھتا ہے دنیا کو اپنا

باز آ جا گناہوں سے ورنہ عمر بھر ہاتھ ملنا پڑے گا

پیار سے سب کو اپنا بنا لے جس قدر ہو سکے تو دعا لے

مت لگا آگ نفرت کی ناداں ورنہ تجھ کو بھی جلنا پڑے گا

بال سے بھی ہے باریک رستہ اور تلوار سے تیز تر ہے

اس پہ گٹھری گناہوں کی لے کر حشر میں تجھ کو چلنا پڑے گا

غم کے ماروں کی حالت پہ ناداں ہنس رہا ہے مگر یاد رکھنا

اشک بن بن کے آنکھوں سے اپنی ایک دن تجھ کو ڈھلنا پڑے گا

قبر میں جس گھڑی جائے گا تو نیکیاں کام آئیں گی تیرے

باز آجا گناہوں سے ورنہ حشر تک ہاتھ ملنا پڑے گا

چاہتا ہے اگر سرخروئی چاہتا ہے اگر نیک نامی

یہ ادا چھوڑنی ہوگی تجھ کو اس چلن کو بدلنا پڑے گا

ہے اگر تجھ کو انسان بننا تو یہ قیصرؔ میری بات سن لے

چھوڑنی ہوگی ہر اک برائی خواہشوں کو کچلنا پڑے گا