jo is jahan-e-KHarab mein dil buton se apna laga chuke hain

jo is jahān-e-ḳharāb meñ dil butoñ se apnā lagā chuke haiñ

Dareñge nār-e-jahīm se kyā ki jān-o-tan sab jalā chuke haiñ

Dare gunah se balā hamārī azal ke din se janāb-e-bārī

hamāre āqā-e-nām-var ko shafī.a-e-mahshar banā chuke haiñ

tujhī ko hai paas bekasoñ kā tujhī ko hai sharm muflisoñ kī

ki naqd-e-mānūs-o-nañg apnā tirī hī rah meñ luTā chuke haiñ

zamīn-o-koh-o-malak bhī mil kar agar uThā.eñ na uTh sakegā

jo baar ulfat kā us hasīñ kī ham apne sar par uThā chuke haiñ

koī kisī dar pe sar jhukā.e jo chāhe dair-o-haram ko jaa.e

ḳhalīl terī galī ko ham to bas apnā ka.aba banā chuke haiñ

burī balā hai ġham-e-mohabbat ḳhudā rā is aaseb se bachā.e

hazāroñ hushiyār lākhoñ siyāne isī maraz meñ to jā chuke haiñ

ḳhudā ke fazl-o-karam se terā huā na ab tak to bāl-bekā

'jamālī' tere husūd kyā kyā na tujh pe tūfāñ uThā chuke haiñ

jo is jahan-e-KHarab mein dil buton se apna laga chuke hain

Darenge nar-e-jahim se kya ki jaan-o-tan sab jala chuke hain

Dare gunah se bala hamari azal ke din se janab-e-bari

hamare aaqa-e-nam-war ko shafia-e-mahshar bana chuke hain

tujhi ko hai pas bekason ka tujhi ko hai sharm muflison ki

ki naqd-e-manus-o-nang apna teri hi rah mein luTa chuke hain

zamin-o-koh-o-malak bhi mil kar agar uThaen na uTh sakega

jo bar ulfat ka us hasin ki hum apne sar par uTha chuke hain

koi kisi dar pe sar jhukae jo chahe dair-o-haram ko jae

KHalil teri gali ko hum to bas apna kaba bana chuke hain

buri bala hai gham-e-mohabbat KHuda ra is aaseb se bachae

hazaron hushiyar lakhon siyane isi maraz mein to ja chuke hain

KHuda ke fazl-o-karam se tera hua na ab tak to baal-beka

'jamali' tere husud kya kya na tujh pe tufan uTha chuke hain