جو اس جہان خراب میں دل بتوں سے اپنا لگا چکے ہیں

جو اس جہان خراب میں دل بتوں سے اپنا لگا چکے ہیں

ڈریں گے نار جحیم سے کیا کہ جان و تن سب جلا چکے ہیں

ڈرے گنہ سے بلا ہماری ازل کے دن سے جناب باری

ہمارے آقائے نامور کو شفیع محشر بنا چکے ہیں

تجھی کو ہے پاس بیکسوں کا تجھی کو ہے شرم مفلسوں کی

کہ نقد مانوس و ننگ اپنا تری ہی رہ میں لٹا چکے ہیں

زمین و کوہ و ملک بھی مل کر اگر اٹھائیں نہ اٹھ سکے گا

جو بار الفت کا اس حسیں کی ہم اپنے سر پر اٹھا چکے ہیں

کوئی کسی در پہ سر جھکائے جو چاہے دیر و حرم کو جائے

خلیل تیری گلی کو ہم تو بس اپنا کعبہ بنا چکے ہیں

بری بلا ہے غم محبت خدا را اس آسیب سے بچائے

ہزاروں ہشیار لاکھوں سیانے اسی مرض میں تو جا چکے ہیں

خدا کے فضل و کرم سے تیرا ہوا نہ اب تک تو بال بیکا

جمالیؔ تیرے حسود کیا کیا نہ تجھ پہ طوفاں اٹھا چکے ہیں