kisi se bhi gham-e-dil ka mudawa ho nahin sakta

kisī se bhī ġham-e-dil kā mudāvā ho nahīñ saktā

jo tum chāho to phir ai mehrbāñ kyā ho nahīñ saktā

zamāne bhar kā ho kar tum se ho nisbat ye mumkin hai

tumhārā ho ke phir koī kisī kā ho nahīñ saktā

azal meñ maiñ ne dekhā hai tumhāre husn-e-rañgīñ ko

kisī sūrat mirī āñkhoñ ko dhokā ho nahīñ saktā

haqīqat kyā hai duniyā kī vo chāheñ diin bhī de deñ

saḳhī ke dar se ḳhālī lauT jaanā ho nahīñ saktā

burā huuñ jis qadar ai 'rāz' ye maiñ jāntā ḳhud huuñ

magar un ko mirā miTnā gavārā ho nahīñ saktā

kisi se bhi gham-e-dil ka mudawa ho nahin sakta

jo tum chaho to phir ai mehrban kya ho nahin sakta

zamane bhar ka ho kar tum se ho nisbat ye mumkin hai

tumhaara ho ke phir koi kisi ka ho nahin sakta

azal mein main ne dekha hai tumhaare husn-e-rangin ko

kisi surat meri aankhon ko dhoka ho nahin sakta

haqiqat kya hai duniya ki wo chahen din bhi de den

saKHi ke dar se KHali lauT jaana ho nahin sakta

bura hun jis qadar ai 'raaz' ye main jaanta KHud hun

magar un ko mera miTna gawara ho nahin sakta