کسی سے بھی غم دل کا مداوا ہو نہیں سکتا

کسی سے بھی غم دل کا مداوا ہو نہیں سکتا

جو تم چاہو تو پھر اے مہرباں کیا ہو نہیں سکتا

زمانے بھر کا ہو کر تم سے ہو نسبت یہ ممکن ہے

تمہارا ہو کے پھر کوئی کسی کا ہو نہیں سکتا

ازل میں میں نے دیکھا ہے تمہارے حسن رنگیں کو

کسی صورت مری آنکھوں کو دھوکا ہو نہیں سکتا

حقیقت کیا ہے دنیا کی وہ چاہیں دین بھی دے دیں

سخی کے در سے خالی لوٹ جانا ہو نہیں سکتا

برا ہوں جس قدر اے رازؔ یہ میں جانتا خود ہوں

مگر ان کو مرا مٹنا گوارا ہو نہیں سکتا