aae the un ke sath nazare chale gae

aa.e the un ke saath nazāre chale ga.e

vo shab vo chāñdnī vo sitāre chale ga.e

shāyad tumhāre saath bhī vāpas na aa sakeñ

vo valvale jo saath tumhāre chale ga.e

kashtī taḌap ke halqa-e-tūfāñ meñ rah ga.ī

dekho to kitnī duur kināre chale ga.e

har āstāñ agarche tirā āstāñ na thā

har āstāñ pe tujh ko pukāre chale ga.e

shām-e-visāl ḳhāna-e-ġhurbat se ruuTh kar

tum kyā ga.e nasīb hamāre chale ga.e

dekhā to phir vahīñ the chale the jahāñ se ham

kashtī ke sāth-sāth kināre chale ga.e

mahfil meñ kis ko tāb-e-huzūr-e-jamāl thī

aa.e tirī nigāh ke maare chale ga.e

jaate hujūm-e-hashr meñ ham 'āsiyān-e-dahr

ai lutf-e-yār tere sahāre chale ga.e

dushman ga.e to kashmakash-e-dostī ga.ī

dushman ga.e ki dost hamāre chale ga.e

jaate hī un ke 'saif' shab-e-ġham ne aa liyā

ruḳhsat huā vo chāñd sitāre chale ga.e

aae the un ke sath nazare chale gae

wo shab wo chandni wo sitare chale gae

shayad tumhaare sath bhi wapas na aa saken

wo walwale jo sath tumhaare chale gae

kashti taDap ke halqa-e-tufan mein rah gai

dekho to kitni dur kinare chale gae

har aastan agarche tera aastan na tha

har aastan pe tujh ko pukare chale gae

sham-e-visal KHana-e-ghurbat se ruTh kar

tum kya gae nasib hamare chale gae

dekha to phir wahin the chale the jahan se hum

kashti ke sath-sath kinare chale gae

mahfil mein kis ko tab-e-huzur-e-jamal thi

aae teri nigah ke mare chale gae

jate hujum-e-hashr mein hum 'asiyan-e-dahr

ai lutf-e-yar tere sahaare chale gae

dushman gae to kashmakash-e-dosti gai

dushman gae ki dost hamare chale gae

jate hi un ke 'saif' shab-e-gham ne aa liya

ruKHsat hua wo chand sitare chale gae