کشتی ہے سکوں کی موجوں میں اتنا ہی سہارا کافی ہے

کشتی ہے سکوں کی موجوں میں اتنا ہی سہارا کافی ہے

میرے تو لیے اے جان جہاں بس نام تمہارا کافی ہے

اب کون بھنور کی فکر کرے اب کون بلائے طوفاں کو

جب ڈوبنا ہی مقصد ٹھہرا تو پھر یہ کنارا کافی ہے

مے خانے میں آئے ہیں یوں ہی ساقی سے غرض ہے کوئی نہیں

مستی کے لیے مستی کی قسم یہ ذوق ہمارا کافی ہے

اے صاحب دل اے اہل نظر آزار کی باتیں بھی کہہ دوں

جو رازؔ کے ہے پردے میں نہاں اس کا ہی اشارا کافی ہے