یہ ہے میکدہ یہاں رند ہیں یہاں سب کا ساقی امام ہے

یہ ہے میکدہ یہاں رند ہیں یہاں سب کا ساقی امام ہے

یہ حرم نہیں ہے اے شیخ جی یہاں پارسائی حرام ہے

کوئی مست ہے کوئی تشنہ لب تو کسی کے ہاتھ میں جام ہے

مگر اس کا کوئی کرے گا کیا یہ تو میکدے کا نظام ہے

جو ذرا سی پی کے بہک گیا اسے میکدے سے نکال دو

یہاں کم نظر کا گزر نہیں یہاں اہل ظرف کا کام ہے

یہ جناب شیخ کا فلسفہ ہے عجیب سارے جہان سے

جو وہاں پیو تو حلال ہے جو یہاں پیو تو حرام ہے

اسی کائنات میں اے جگرؔ کوئی انقلاب اٹھے گا پھر

کہ بلند ہو کے بھی آدمی ابھی خواہشوں کا غلام ہے