hum qad-e-yar ko sarw-e-chamani kahte hain

ham qad-e-yār ko sarv-e-chamanī kahte haiñ

zulf-e-dil-dār ko mushk-e-khutanī kahte haiñ

vasf un ke durr-e-dandāñ kā karūñ kyā tahrīr

jo mubassir haiñ vo hiire kī kanī kahte haiñ

nok-e-mizhgāñ kī dikhā kar vo sitam-gar bolā

nezā-bāzo ise barchhī kī anī kahte haiñ

rag-e-gul kartī hai us jism pe kār-e-nashtar

dekh ai dil use nāzuk-badanī kahte haiñ

bātoñ bātoñ meñ liyā chhīn hamāre dil ko

inhīñ chāloñ ko to sab rāh-zanī kahte haiñ

maut bhī aa.e to kūche meñ unhīñ ke aa.e

do-jahāñ meñ jinheñ makkī madnī kahte haiñ

hum qad-e-yar ko sarw-e-chamani kahte hain

zulf-e-dil-dar ko mushk-e-khutani kahte hain

wasf un ke durr-e-dandan ka karun kya tahrir

jo mubassir hain wo hire ki kani kahte hain

nok-e-mizhgan ki dikha kar wo sitam-gar bola

neza-bazo ise barchhi ki ani kahte hain

rag-e-gul karti hai us jism pe kar-e-nashtar

dekh ai dil use nazuk-badani kahte hain

baaton baaton mein liya chhin hamare dil ko

inhin chaalon ko to sab rah-zani kahte hain

maut bhi aae to kuche mein unhin ke aae

do-jahan mein jinhen makki madni kahte hain