khaDa hai der se aashiq kafan bandhe hue sar se

khaḌā hai der se 'āshiq kafan bāñdhe hue sar se

tere sadqe tere qurbān mere qātil nikal ghar se

kisī ne vasl meñ ye kah ke dil kumlā diyā merā

uTho yaañ se pare sar ko mere phūloñ kī bistar se

ye kah do abr-e-bārāñ se agar barse to yuuñ barse

ki jaise meñh barastā hai hamāre dīda-e-tar se

ho is but se yārāna jo zālim dil kā patthar hai

paḌīñ patthar muqaddar par laḌī hai aañkh patthar se

agar chāhūñ to qaabū maiñ unheñ kyā kar nahīñ saktā

karūñ to kyā karūñ lāchār huuñ apne muqaddar se

savāl-e-bosa-e-lab par but-e-kamsin ye kahtā hai

nahīñ maiñ aap ke qābil hañsī kiije barābar se

shab-e-vaslat azaañ sun kar chhurī sī phir ga.ī dil par

ki bismillāh kī aa.ī sadā allāhu-akbar se

na pahuñchā koī dīvār-e-haqīqat kī bulandī par

maiñ kyuuñ kar paar jā saktā huuñ us hadd-e-sikandar se

ḳhudā ko yaad karne aaj kyuuñ baiThe ho masjid meñ

nikālā kis liye 'tāhir' butoñ ne tum ko mandir se

khaDa hai der se 'ashiq kafan bandhe hue sar se

tere sadqe tere qurban mere qatil nikal ghar se

kisi ne wasl mein ye kah ke dil kumla diya mera

uTho yan se pare sar ko mere phulon ki bistar se

ye kah do abr-e-baran se agar barse to yun barse

ki jaise meinh barasta hai hamare dida-e-tar se

ho is but se yarana jo zalim dil ka patthar hai

paDin patthar muqaddar par laDi hai aankh patthar se

agar chahun to qabu main unhen kya kar nahin sakta

karun to kya karun lachaar hun apne muqaddar se

sawal-e-bosa-e-lab par but-e-kamsin ye kahta hai

nahin main aap ke qabil hansi kije barabar se

shab-e-waslat azan sun kar chhuri si phir gai dil par

ki bismillah ki aai sada allahu-akbar se

na pahuncha koi diwar-e-haqiqat ki bulandi par

main kyun kar par ja sakta hun us hadd-e-sikandar se

KHuda ko yaad karne aaj kyun baiThe ho masjid mein

nikala kis liye 'tahir' buton ne tum ko mandir se