har shai mein apna yar ne jalwa dikha diya

har shai meñ apnā yaar ne jalva dikhā diyā

dil se hamāre ġhair kā naqsha miTā diyā

bhātā nahīñ aañsū jo vo kartā hai zikr-e-ġhair

ham ne to dil meñ yaar kā naqsha jamā diyā

vo husn-e-dilrubā hai tumhārā jahān meñ

lailā dikhā ke is liye majnūñ banā diyā

muusā ko koh-e-tūr pe jab bekalī huī

phir ruḳh se apne yaar ne burqa' uThā diyā

ārām-o-’aish se vahāñ mulk-e-'adam meñ the

lā kar ke daam 'ishq meñ ham ko phañsā diyā

duniyā ke mai-kade meñ to sote the be-ḳhabar

sote the bas-ki yaar ne ham ko jagā diyā

bait-ul-haram meñ dair meñ jo kuchh vahī to hai

momin koī jahāñ meñ barahman banā diyā

ik din tumhārī bazm ke duurī meñ sāqiyā

jām-e-mai-e-tauhīd kā ham ko pilā diyā

shāhid ke dil se is liye jaatī rahī duī

murshid ne ham ko barzaḳh-e-soġhrā banā diiyā

har shai mein apna yar ne jalwa dikha diya

dil se hamare ghair ka naqsha miTa diya

bhata nahin aansu jo wo karta hai zikr-e-ghair

hum ne to dil mein yar ka naqsha jama diya

wo husn-e-dilruba hai tumhaara jahan mein

laila dikha ke is liye majnun bana diya

musa ko koh-e-tur pe jab bekali hui

phir ruKH se apne yar ne burqa' uTha diya

aaram-o-’aish se wahan mulk-e-'adam mein the

la kar ke dam 'ishq mein hum ko phansa diya

duniya ke mai-kade mein to sote the be-KHabar

sote the bas-ki yar ne hum ko jaga diya

bait-ul-haram mein dair mein jo kuchh wahi to hai

momin koi jahan mein barahman bana diya

ek din tumhaari bazm ke duri mein saqiya

jam-e-mai-e-tauhid ka hum ko pila diya

shahid ke dil se is liye jati rahi dui

murshid ne hum ko barzaKH-e-soghra bana diya