ہو کے روپوش نہ دل توڑ تمنائی کا

ہو کے روپوش نہ دل توڑ تمنائی کا

حوصلہ پست نہ کر اپنے تو شیدائی کا

نت نئے روپ میں تجھے دیکھا جس جا دیکھا

کیا ٹھکانہ ہے رخِ یار کی زیبائی کا

کبھی مسجد کبھی مندر کبھی دل میں مقیم

کیا پتہ پائے کوئی اس بتِ ہرجائی کا

ہم بھی باندھیں گے تیرے عشق میں احرامِ جنوں

ہم بھی دیکھیں گے تماشہ تیری لیلائی کا

رات کٹتی نہیں اے چاند یہ ان سے کہنا

دن گزرتا ہے تڑپ کر تیرے سودائی کا

جیتے جی سر نہ اٹھے یار کے در سے بیدمؔ

یہ مزہ ہے اسی چوکھٹ پہ جبیں سائی کا