ada banki nirali chaal surat bholi-bhaali hai

adā bāñkī nirālī chaal sūrat bholī-bhālī hai

abhī nādān haiñ kam-sin haiñ tabī'at lā-ubālī hai

ilāhī kyuuñ dhaḌaktā hai kaleja be-sabab apnā

balā kyā phir koī sar par hamārī aane vaalī hai

miTātī hai un hī ko miT ga.e haiñ jo mohabbat meñ

tumhārī chaal kī shoḳhī bhī duniyā se nirālī hai

bahut guzarī hai baaqī hai bahut kam raat hai pyārī

Thahr jaao Thahr jaao sehr ab hone vaalī hai

Thahr kar dekh o qātil tamāshā apnī bismil kā

tire jaane se pahle jaan us kī jaane vaalī hai

javāb us vaqt kyā doge batāo ḳhūn-e-nāhaq kā

ḳhudā ke sāmne ik roz pursish hone vaalī hai

lagā hai aañkh meñ surma paḌā hai tel bhī sar meñ

savārī aap kī kyā ġhair ke ghar jaane vaalī hai

na dil dete kabhī un ko agar ham jānte ‘lā.iq’

ki furqat hone vaalī hai qayāmat hone vaalī hai

ada banki nirali chaal surat bholi-bhaali hai

abhi nadan hain kam-sin hain tabi'at la-ubaali hai

ilahi kyun dhaDakta hai kaleja be-sabab apna

bala kya phir koi sar par hamari aane wali hai

miTati hai un hi ko miT gae hain jo mohabbat mein

tumhaari chaal ki shoKHi bhi duniya se nirali hai

bahut guzari hai baqi hai bahut kam raat hai pyari

Thahr jao Thahr jao sehr ab hone wali hai

Thahr kar dekh o qatil tamasha apni bismil ka

tere jaane se pahle jaan us ki jaane wali hai

jawab us waqt kya doge batao KHun-e-nahaq ka

KHuda ke samne ek roz pursish hone wali hai

laga hai aankh mein surma paDa hai tel bhi sar mein

sawari aap ki kya ghair ke ghar jaane wali hai

na dil dete kabhi un ko agar hum jaante ‘laiq’

ki furqat hone wali hai qayamat hone wali hai